Werk jou geld vir jou, selfs in hierdie onseker tye waarin dit voel asof jou sente net nie ver genoeg kan strek nie? Kan mens werklik nog jou eie welvaart skep? En wat is nodig om dit te kan doen?

In hierdie nuwe finansiële reeks, Welvaartskeppers – vanaf Donderdag 7 April 17:30 op kykNET (DStv-kanaal 144) – gaan die broers PJ en Geo Botha deur die land reis en in diepte kyk na al die moontlike strategieë oor hoe mense welvaart vir hulleself kan skep. Hulle gaan met top-entrepreneurs in verskillende velde praat en kykers vertel van die kritiese besluite wat hulle self moes neem om bo uit te kom.

“Suid-Afrika is ’n land vol moontlikhede en potensiaal,” sê PJ. “Tog sit ons met ’n rekord-hoë werkloosheidsyfer en verskeie ander unieke uitdagings in ons land. As welvaartbestuurders het ons gesien dat daar steeds persone is wat nie net vir hulleself welvaart skep nie, maar ook geleenthede vir ander skep. Vir hierdie reeks het ons gaan uitvind hoe hulle dit regkry en ons wil graag hierdie kennis met kykers deel.”

“Ons is passievol oor ons land, ons taal en om finansiële kundigheid aan ander oor te dra,” sê Geo. “In Welvaartskeppers kon ons al die faktore kombineer en as ons ’n verskil kan maak aan net een persoon se denkwyse, het ons in ons doel geslaag.”

“As Suid-Afrikaners is nie nodig vir ons om vir die res van die wêreld terug te staan nie,” voeg PJ by. “Ons het ongelooflike talentvolle en hardwerkende individue. Ons is gewoond daaraan om gereeld struikelblokke te oorkom en dit maak ons net nog sterker.” 

Geo het ’n B.Comm-honneursgraad in interne ouditkunde asook ’n diploma in finansiële beplanning. PJ is ’n gekwalifiseerde geoktrooieerde rekenmeester. Hulle pa, Dr. Riaan Botha, gaan ook elke week ingeroep word om wenke oor finansiële bestuur te gee. Die Botha’s het dus meer as genoeg kennis om met kykers te deel.

Van die episode-tema’s sluit in “Moet ek my passie volg om welvaart te skep?”, “Het jy ’n formele kwalifikasie nodig om welvaart te skep?”, “Cryptogeldeenhede as ‘n nuwe bron van inkomste” en “Wanneer is genoeg, genoeg”.

Skakel vanaf Donderdag 7 April 17:30 op kykNET (DStv-kanaal 144) in vir Welvaartskeppers.