Ollie Viljoen

Ollie trek na ‘n baie besige musikale- en storievertelkuns geskiedenis, met Johannesburg as basis, aan die begin van 2007 Kaap toe vir rustiger wees en stilte...

Met CD-opnames, bekendstellingstoere, nuwe produksies en talle solo vertonings landwyd, doen Ollie gemiddeld 18 vertonings per maand en met reisdae tussenin, is hy skaars by sy nuwe huis in Sandbaai.

2011 se top-rat-tempo het alles te make met Ollie se energie. Van die effe jonger lede in die geselskap kla soms van afgeremde tamheid.... dan draf Ollie steeds pasaangewend voor.

Die wonderlike huwelik tussen die generasies en Rock, Blues en Jazz met Boeremusiek, is ‘n wenresep!

“Watter generasiegaping?”

"Dis alles baie lekker!” is Ollie se antwoord op al die gewone vrae. Tweeduisend en elf gaan kook!

En dan tree jy seker af Ollie? “Nee! Ek tree net op.” sê hy met ‘n blitsige pittige andwoord.

Jaco van Deventer

Jaco van Deventer het op 10 jarige ouderdom begin konsertina speel. Kort daarna trek die kitaar sy aandag en die res is geskiedenis. Jaco bespeel ook die banjo, mondfluitjie en baskitaar.

As voltydse musikant het hy al optredes gedoen vir Zak van Niekerk, Gerrie Pretorius ,Hugo, Ollie Viljoen, Valiant Swart, Paul Ferns en vele meer. Hy was ook voorheen 'n lid van die groep Beeskraal, maar het onlangs aangesluit by DJ Ossewa. Alhoewel sy passie by musiek lê, is Jaco ook ' n kranige filmmaker en het al 'n hele paar produksies die lig laat sien.

Ricus Nel

Ricus, wat dertien instrumente kan speel, is ‘n ou bekende in musiekkringe. Hy het al saam met die grootste name in Afrikaanse musiekbedryf die verhoog gedeel – Bok van Blerk, Juanita du Plessis, Theuns Jordaan en Lianie May om net ‘n paar te noem, en is ook gereeld te sien op Jukebox een van die gewildste TV-programme op kykNET
Ricus is onlangs by Select geteken, en dis met groot verwagting wat ons uitkyk vir sy eerste Solo CD.

Hierdie hoogs begaafde musikant is gebore in Rustenburg in 1979 waar hy meeste van sy grootword jare deurgebring en by verskeie geleenthede as musikant opgetree het. Ricus het egter groener weivelde gaan soek en na Pretoria verhuis.

Ricus doen gereeld sessiewerk in studio’s vir verskeie musikante. Van bekende gesigte in die bedryf soos Pieter Smith tot minder bekendes. Sy naam verskyn in meeste kunstenaars se CD inlets.

Wanneer kunstenaars DVD’s opneem, is Ricus Nel die eerste keuse musikant om te nader.
Hy is op Kunstenaars soos Kurt Darren, Juanita du Plessis, Wickus van der Merwe, Zack van Niekerk, Nadine en nog ander se DVD’s te sien.

Skouspel het vanjaar hul tiende verjaarsdag gevier waar hy weer sy verskyning op Sun City se Super Bowl gemaak het. Hy was by 8 van die 10 Skouspelle as musikant betrokke, wat iets verklap oor sy gewildheid as musikant en hom ‘n besliste kenner van sy instrumente maak.

Met Ricus Nel se ervaring in die bedryf as musikant en sy vermoeë om professioneel met die kameras om te gaan, plaas dit hom in ‘n klas van sy eie. In onvoorwaardelike Ricus Nel styl.

Kabous Meiring

Kabous, oftewel Karen-Christine is ‘n all-rounder wat haar loopbaan agter die kamera begin het. Eers as assistent-regisseur en toe later voor die kamera as die die bekende Nutsman se side-kick. Toe die span agterkom sy kan nie verf nie, vra hulle haar om sommer die program aan te bied.

Kort daarna beland sy agter die mikrofoon by RSG as bydraer vir die RSG Kuns-program. Dis hier waar Kabous besef dat al wat sy wil doen is gesels en as sy daarvoor betaal kan word, nog beter! Ook dat sy baie lief sal kan word vir radio en televisie-joernalistiek. Tot haar groot vreugde besluit sy egter om vas te werk vir ‘n ruk en maak ‘n wye en lekker draai in die uitgewersbedryf by NB-Uitgewers waar daar baie gesels word en darem so bietjie gelees word ook. Tot haar groot verbasing skryf sy selfs een of twee teaterresensies vir die dagblaaie.

Die media in al sy vorme bly ‘n voorliefde en Kabous is tans ‘n mediabestuurder by die Universiteit van die Vrystaat vir onder meer Kovsie FM, stel die boekereeks vir Aardklop saam en is betrokke by kykNET se bekende Fiesta-teatertoekennings. Sy bly in Kaapstad en Bloemfontein en is mal oor Johannesburg.

Varstrap is een van die lekkerste goed wat Kabous al ooit gedoen het en sy reken sy gaan binnekort self begin konsertina speel, dalk met ‘n lekker skoot indie-rock of hip-hop, soos dit deesdae hoort!

Jaco Spies

Jaco Heinrich Spies is gebore op 15 Oktober 1975 in Calvinia. Hy het gematrikuleer aan Jim Fouche Hoërskool in Bloemfontein in 1993. In 1996 was hy verbonde aan Lady Grey Akdemie vir Kuns en Musiek in Lady Grey.

In 2000 stig hy saam met Johnre van Huyssteen Geblikte Afrikaans - 'n eiesoortige besigheid wat unieke Afrikaanse produkte in blikke vervaardige, bemark en verkoop het. In 2002 wen hy ‘n Pendoringtoekenning as Kreatiewe Direkteur vir Onder-die-lyn Veldtog vir die Bemarking van Geblikte Afrikaans.

In 2001 stig hy saam met Johrné en Lienka Coetzee die bekroonde Afrikaanse "folk-rockgroep", ddisselblom. Daarna waag hy sy hand as akteur en van 2005 tot 2010 vertolk hy die rol van Hein Bernard in die gewilde kykNET-sepie, Villa Rosa. Hy slaan selfs ‘n rol los in die veel besproke en kontroversiële Darrell Roodt film, ‘Winnie’.

Tussendeur die toneelspel en ddisselblom-optredes was hy ook verantwoordelik vir die oorspronklike klankbaan van die Johan Heyns film, Hond se dinges (2008).

Hy is tans ook bedrywig agter die skerms as produksiebestuurder van die kykNET-komedie, Proesstraat, en assistent-regisseur vir die realiteitsreeks, ‘Boer soek ‘n Vrou’ (2010 – 2011).