Freek Robinson

Freek Robinson is gebore in Pretoria, maar is gou daarna saam met die gesin Afrika in - Malawi, Zambie en Zimbabawe. Na vyf jaar van rondswerf, is die gesin Transkei toe. Daar het hy eers in Lusikisiki gebly. Hy het skool toe begin gaan in Umtata as koshuisleerling.

In sy middeljare het Freek se pa besluit om medies te swot. Hulle het toe Pretoria toe getrek. Daar het dit maar broekskeur gegaan, maar sy pa het klaar gemaak en weer Transkei toe getrek om as dokter te praktiseer. Freek moes agterbly en loseer terwyl hy in matriek was.

Na skool is hy Tukkies toe om BA te studeer, gevolg deur 'n honneurs in Afrikaanse letterkunde.

Hy het sy joernalistieke loopbaan begin by die destydse Oggendblad as sub in die nagkantoor.

Met die begin van televisie het hy aansoek gedoen en 'n pos gekry by die SAUK se TV-Nuus.

Sy eerste groot vuurdoop as joernalis was om verslag te doen oor die Soweto-onluste waar hy amper sy lewe verloor het.

Aan die begin van die tagtigs het hy parlementere verslaggewer geword.

In 1985 word hy uitvoerende regisseur van die aktualiteits-program Netwerk.

Vanaf 1988 tot 1991 was hy Europese korrespondent gebaseer in Londen.

Hy kom terug na Suid-Afrika as uitvoerende regisseur en aanbieder van Agenda op 'n Sondagaand.

Tydens die 1994-verkiesing was hy die voorsitter van verskeie regstreekse politieke debatte regoor die land asook die voorsitter van die debat tussen Nelson Mandela en F.W. de Klerk.

Na '94 is aktualiteitsprogramme almal saamgesmelt en Fokus/Focus genoem. Freek was die uitvoerende regisseur en aanbieder van die Sondagprogram.

Die program en Freek het verskeie pryse gewen, onder meer van Vodacom en die Commonwealth Broadcasting Association.

In 2008 verlaat Freek TV-nuus en kry 'n pos by die Kommunikasie-department van die SAUK. Hy bly egter aan as aanbieder van Fokus. 'n Jaar later bedank hy toe hy die aanbod kry om ook die program Praat Saam op RSG aan te bied.

Aan die begin van 2010 word hy die posisie aangebied om aanbieder te wees van 'n nuwe aktualiteitsprogram op Kyknet: Robinson Regstreeks.

In Julie van dieselfde jaar vra e-TV hom om een van die ankers te wees van die nuwe eNuus op kykNET.

Freek is getroud met Liza, 'n televisie-regisseur. Hulle het twee seuns.