Rian: 10 Mei 2012 - Roelien Schutte en Eileen de Jager

Die titel van hulle boek is “Bloedsusters” en die omslag waarsku dat dit nie vir sensitiewe lesers bedoel is nie. Met goeie rede. Dit is die verhaal van Roelien Schutte en Eileen de Jager wat ‘n besigheid bedryf wat forensiese tonele opruim… moord-, selfmoord- en ongelukstonele. Dis met seep en borsel en deernis en begrip, sê hulle, waarmee hulle opruim. Roelien en Eileen is die gaste van Rian van Heerden in Rian. Die program moet liefs deur sensitiewe kykers vermy word.

Rian: 3 Mei 2012 - Pik Botha en Evita Bezuidenhout

Dit was laas in 1994 toe Evita Bezuidenhout en Pik Botha saam voor die televisiekamera was in Pieter-Dirk Uys se reeks Funigalore. Amper twee dekades later maak hulle weer so, die slag as die gaste van Rian van Heerden in Rian. Beide het van politieke kleur verander en die ANC omhels… maar om eie en anderste redes. Pik, Evita en Rian saam? Dit kan sorg vir pret en die uitlap van ‘n geheimpie of twee.

Kwêla: 25 April 2012 - Rian van Heerden

Sedert Rian van Heerden die radiostasie, Jacaranda 92.4 FM se oggendprogram oorgeneem het, is hy pal in die moeilikheid. Maar dié man wat nie op sy mond geval is nie, weet wanneer hy dinge te ver gevat het en is nie skaam om sy skuld te bely nie. Hy is ook aanbieder van Rian op kykNET en die nuwe seisoen het onlangs begin. Hy gesels met Coenie oor sy MTN Radio-toekenning en hoekom hy so gereeld in die sop beland.

Rian: 19 April 2012 - Michael Abrahamson en Kevin Horsley

Om ‘n dik boek uit jou kop te kan leer en die vyf voorafgaande en daaropvolgende vyf woorde van enige vyf opeenvolgende woorde in enige sin in die boek, presies korrek te kan opsê… dis min of meer wat Rian van Heerden se twee gaste kan regkry. Michael Abrahamson en Kevin Horsley het meesterlike geheuevermoëns en sê dis nie omdat hulle super breins het nie maar wel omdat hulle die kunsies van geheue kon bemeester het.

Rian: 12 April 2012 - Piet Rudolph en Eddie Maltitz

Eddie von Maltitz, die bekende melkboer van Ficksburg se wêreld, sê hy is geroepe om een van die leiers van ons land te wees. Behalwe dat hy hongersnood en aardverwarming wil hokslaan, wil hy ook die Amerikaanse geheime diens die stryd aansê omdat hulle met ons weerpatroon lol en die reën wegjaag. Piet Rudolph is bekend vir sy baklei-lus vir enige iemand en enige iets wat sy volk te na kom en was al diep in die moeilikheid oor sy opstandigheid teen gesag. Beide Piet Rudolph en Eddie von Maltitz kom uit die regse politiek. Is hulle verteenwoordigend van regses? Is hulle hoe die konserwatiewes in ons land dink en doen? Hulle praat met Rian van Heerden in Rian.

Rian: 11 Oktober 2011 - Steve Booysen

Hy sing karaoke, luister graag na sy jukebox, weier om tuinwerk te doen en sal nooit in ‘n karavaan of tent gaan vakansie hou nie. Steve Booysen, die voormalige grootbaas van ABSA, sê terwyl jy kan moet jy die dinge doen waaroor jy droom… en vir hom is dit om te kan woeker in die wêreld van kuns en vermaak. Steve gesels met Rian van Heerden in Rian oor sy swaarkry kinderjare en hoe hy daaruit ontsnap het om later tot aan die boonste sport van die bankwese se leer te kon klim.

Rian: 4 Oktober 2011 - Prof. Kobus van Rooyen

Prof. Kobus van Rooyen. Dit was soms verspotlik en soms polities-kleinlik soos die sensuurbase in die 1980s moes sny, toeplak of verban. Prof. Kobus van Rooyen, die voormalige voorsitter van die Sensuurraad, vertel hoe nadat die Scope-tydskrif van sensuur bevry is, verkope daarvan dramaties geval het en hoe die uitgewer kom smeek het dat die sterretjies moes terugkom om tog maar net weer kopers te kan lok.

Rian: 13 September 2011 - Victor Vermeulen

Christopher Reeves, die oorspronklike Superman… Arnold Schwarzenegger… Nelson Mandela… drie ikoniese figure… en al drie van hulle het hulde gebring aan ‘n uitsonderlike jong Suid-Afrikaner… Victor Vermeulen. En hoekom?, vra jy. Oor hy geweier het om in sak en as te gaan sit toe die noodlot tref en van hom ‘n kwadrupleeg maak. Victor Vermeulen is ‘n motiveringspreker sonder weerga en kom praat met Rian in Rian.

Rian: 6 September 2011 - Henrietta Gryffenberg

Henrietta Gryffenberg het NIE ‘n affair met haar tennisafrigter nie. Sy sê die lat is nou wel oulik maar dis omdat sy elke keer die bal oor die draad slaan, dat hulle so saam-saam vir lang rukke in die bos verdwyn om daarna te soek.

Rian: 30 Augustus 2011 - Magnus Heystek (Deel 2)

Die disselboom klop nie meer so lekker in die ekonomie nie… dit het sommer iewers langs die pad in die stof geval! Hoekom en hoe nou gemaak? Dis wat Rian in Rian vir Magnus Heystek vra.