Berrie Maritz

Die oorsprong van dié monster is nog onbekend. Talle navorsers het al met hul hande in hul hare gesit om sy spesie te identifiseer. Na jare se navorsing word dit beweer dat Bernard (Berrie) gebore is in 'n plaaslike KFC. Na jare se wegkruip agter die Coke yskas het Colonel Sanders Berrie ontdek en aangeneem, hom alles van die lewe geleer, behalwe om ʼn baard te groei. Danksy sy gebraaide hoender gevulde opvoeding behou hy ook die wêreld rekord vir die vinnigste hoederboudjie gaarmaak en sy naam staan trots in die boeke geskryf. Sanders moes hom egter die wêreld instuur en toe die Lagnesmonsters eendag bitter honger was en naby aan die dood, het Berrie tot hul redding gekom met ʼn Variety Meal. Berrie is versot op fietsry al kan hy dit nie doen nie en het ʼn fobie vir toonnaels. Talle boeke is geskryf om die spesie te bewonder vir sy unieke lag, persoonlikheid en uithouvermoë.

Berrie is vandag te siene op die NWU Kampus waar hy BA Kommunikasie en Sielkunde studeer, en doen ook tans ʼn Meesters in Baardgroei 101.

Renier Esterhuizen

Gebore in die Franse dorpie Lagnes (die dorp bestaan regtig, gaan kyk maar), was Renier se koms as 'n teken van hoop gesien deur die inwoners van die dorp. Die dorpie, wat eers as Lagnet bekend gestaan het, is tydens die Nazi besetting van die Tweede Wêreldoorlog as 'n toetsterrein gebruik vir Duitse Kernwapens. Die effek was dat, as gevolg van radiasie, al die kinders vir die volgende 40 jaar sonder spiere in hul gesigte gebore is. Die mense lyk dus die heeltyd asof hulle ongelukkig en hartseer is, want hul het nie spiere om te kan glimlag nie.

Dit het alles verander toe Renier gebore is, en in plaas van huil toe die dokter hom wiks om asem te begin haal, hardop begin lag het. Die Burgermeester was op die punt om die dorp se naam te verander na Lagnie, maar hy het Renier gesien en in sy toespraak gesê dat hy hoop almal in die dorp sal eendag weer kan LAG NES Renier. So is dorp se naam toe na Lagnes verander. Die monsters in SA het van Renier gehoor, en hy is dadelik ingevoer Suid Afrika toe om deel te word van Lagnes.

Noudat Renier in Suid Afrika is, lag hy lekker saam met die kinders vir wie hy skoolgee, lag terwyl hy aan sy elektriese Ingeneurswese graad studeer, en lag terwyl hy dink aan sy drome om een dag 'n boer te word.

Rico Wessels

Die eilande rondom Samoa is waar Rico Wessels, Lagnes se eie seemonster, se lewe begin het. Uitgespoel op die strand, sonder ouers, het Rico doelloos rond gewandel opsoek na kos en water. Dit was tydens hierdie wandelings wat hy die eiland se aap populasie ontmoet en onmiddelik bevriend het. Met hulle hulp het Rico geleer watter vrugte op die eiland eetbaar is, en hoe om vir hom 'n huisie in die bome te bou. Die ape was ook gaaf genoeg om vir Rico aan die Dolfyne bekend te stel, en hulle te vra om vir Rico te leer visvang. Rico sou egter iets baie belangriker by die dolfyne leer as visvang. Die dolfyne het Rico blootgestel aan die wonder van branders ry, en met die ape se hulp het hy vir hom 'n branderplank gekerf uit palmboomhout. So het Rico vir jare die eilande saam met sy diere vriende verken, met sy branderplank natuurlik altyd byderhand as die golwe goed lyk. Dit was einde 2004, toe Rico een middag 'n massiewe golf op sy eiland sien afkom. Hy kon nie sy geluk glo nie, en het dadelik sy branderplank gegryp en uitgeswem om hierdie golf der golwe te kan ry. Die probleem was dat die golf eintlik die Tsunami van 2004 was wat soveel chaos gesaai het oor die wêreld, en Rico is toe deur die golf opgepik en vir kilometers en kilometers meegesleur. Toe die golf uiteindelik bedaar, was hy in Tafelbaai, en dis hoe hy in Suid Afrika beland het.
Wanneer Rico nie op die uitkyk is vir golwe nie is hy 'n restaurant bestuurder in Stellenbosch met 'n passie vir mense, goeie kos en hope atmosfeer.....en branders.

Francois Esterhuizen

Francois Esterhuizen, of Homie soos almal hom ken, is ook ‘n monster uit die buitenste ruim, gebore op die planeet Alzheimeria. Op diè planeet word almal as bejaardes gebore, en dan word hulle met die jare jonger en jonger, al hoe meer kind. Homie is as pasgeborene senior burger afgevaardig om Aarde toe te kom met een doel voor oë: om die volwasse mense van ons planeet te leer om weer bietjie meer kind te wees, hul inhibisies te verloor en hul verbeeldings terug te kry. Die reis na die planeet het etlike jare gevat, en teen die tyd dat hy hier geland het, was sy voorkoms gelyk aan ‘n man in sy dertigs. Homie se eerste taak op aarde was om ‘n groep te help stig wat die wêreld sou kon verander, ‘n groep wat verveeldheid en verbeeldingloosheid sou veg om elke hoek en draai. Hy het dadelik die land deurkruis op soek na ander monsters wat dink soos hy, en met hulle hulp het Lagnes tot stand gekom. As ons nou net kon keer dat hy nie heeltemal terug in ‘n baba verander nie... Sy lewensmotto is ‘n ou gesegde wat sy ma altyd vir hom aangehaal het: “kjhsd jpoiqew kiopcnie Homie”. Wow, dis diep.

Corneels Schabort

Corneels Schabort, oftewel die Hertog van Usbi Den Laden (die derde), is van adellike afkoms. Hy is gebore in Tseggoslowakye, in een van die invloedrykste families in van die Oos-Europese adelstand. Die familie se idilliese leefstyl is egter onderbreek deur die groot patatdroogte van 1986. Al die Den Laden’s se geld was opgesluit in die patatbedryf, maar daardie jaar het die oes totaal geflop as gevolg van ‘n oormaat bestraling wat oor die land gespoel het van Chernobyl af. Die bietjie spaargeld wat die familie gehad het, is die vorige jaar belê in ‘n Franse maatskappy, wat belowe het die perdekar gaan ‘n “comeback” maak en die motorkar uit die mark uit skuif. Vreemd genoeg het dit nie gewerk nie. Dus was die adellike Den Laden’s nou toe heeltemal bankrot. Corneels se pa het egter ‘n plan gehad. Hy was ingeteken op die Suid-Afrikaanse Landbou weekblad, en het die patatmoontlikhede in die RSA raakgesien. So is Corneels en sy hele familie toe na die RSA toe, waar hulle tans nog wag vir die patats om te groei.

Corneels sit egter nie die trotse patattradisie voort nie. Hy is nog een van die “brein” monsters en is tans dosent by die Departement Chemiese en Mineraalingenieurswese van die Noordwes Universiteit, Potchefstroom.

Tim Theron

Nie al die monsters se oorsprong is op planeet Aarde nie. Tim Theron is gebore op die planeet Awesomenessta, in ‘n sterrestelsel vêr, vêr weg van hier. Met sy mondigwording het sy pa vir hom ‘n Stellar Mark V ruimtetuig as present gegee. Tim het geen tyd gemors nie en dadelik die buitenste ruim ingevaar, waar hy binne enkele jare bekendheid verwerf het as avonturier en ontdekkingsreisiger. Tydens sy besoek aan ‘n antieke stad op die planeet Furga het hy ‘n legende gehoor van ‘n sterrestelsel met net een son, en ‘n planeet met oseane en kontinente vol lewe, en avontuur (en, natuurlik, ‘n McDonalds op elke hoek). Hy het dadelik die ruimte ingevaar en koers gevat in die rigting van die planeet. Enkele ligjare van die Aarde af word sy ruimtetuig egter getref deur die oorblyfsels van Apollo 11 se vuurpyl, en hy stort neer in Potchefstroom, reg langs die saal waar die ander Lagnes Monsters besig was om op te tree. Ons tegnologie is nie gevorderd genoeg om Tim se ruimtetuig te herstel nie, so toe sluit hy maar by Lagnes aan, want hulle lyk asof hulle ook nie van diè planeet af is nie.

Terwyl Tim wag vir die planeet Aarde om die Hyperdrive uit te vind, werk hy as Lagnes se skakelpersoon, asook as vryskutjoernalis en media- konsultant.

Dian Wessels

Dian Wessels se oorsprong is gewortel in kreatiwiteit en abstrakte denke. Anders as die ander monsters is Dian nie gebore of uitgebroei nie. Dian was die skepping van Dr Frankenheimerberger Von Staufenford, ‘n wetenskaplike wat gedurende die vroeë 1900’s bekend was vir sy vreemde eksperimente. Dit was toe die dokter genetiese elemente van etlike bekende kunstenaars, ‘n verskeidenheid kleiner soogdiere, en ‘n Makou gekombineer het dat Dian tot stand gekom het. Tydens die Tweede Wêreldoorlog ontsnap die dokter met Dian uit Duitsland, waar hulle hul pad na die Franse hawe stad van Marseilles gevind het, en toe daar op ‘n Chinese tuna skip geklim het wat op pad was na Mosselbaai. Hier het die twee ‘n vreedsame bestaan gevoer, waar Dian ontwerpe vir nuwe uitvindings geteken het, en sy aangenome pa, die dokter, dit gemaak het en aan Verimark verkoop het.

Noudat Dian mooi groot is, het hy sy pa se huis verlaat en is hy die bestuurder en kreatiewe hoof van Sunflood Studio’s, ‘n ontwerp- ateljee in Stellenbosch.

Bennie Fourie

Nie al die monsters het ‘n gelukkige begin van hul lewens gehad nie. Bennie Fourie is gebore in Belfast, Ierland, waar sy ouers lede was van ‘n onwettige mol mol-veg kartel. Toe Bennie ongeveer 13 jaar oud was, is sy ouers deur die Uzbekistaanse Mafia gevang vir dobbelskuld en na Uzbekistan gestuur om hul skuld af te werk deur afrolwerk te doen in ‘n mafiabeheerde poskantoor. So het Bennie alleen die strate van Belfast aangedurf, met net twee vuurhoutjies en sy getroue troetelmol, Hannes. Hy het homself daartoe verbind om sy ouers weer te vind, maak nie saak wat nie. Hy en Hannes het saam betrokke geraak by straatgevegte vir geld, en so het hy ook by ander kriminele uitgevind dat sy ouers na Suid-Afrika gestuur is deur die Mafia. Uiteindelik het hy genoeg geld gespaar vir swemvlerkies en met Hannes op sy rug swem hy toe na Suid-Afrika. Met die gevegsvernuf wat hy in Ierland opgedoen het, verslaan hy toe die Mafia en bevry sy ouers en die Chinese immigrante wat vir hulle goedkoop handsakke moes maak. Dit is waar hy die bynaam Tae-Yong-Sue gekry het van die dankbare immigrante.

Nou dat Bennie en sy ouers herenig is, spandeer hy sy tyd by die NWU, waar hy ook B.Com Regte studeer.

Burgert Kirsten

Burgert Kirsten, wie se naam aanvanklik Burgsven Kursthon was, is gebore in Lapland, Swede. Burgert is in die sneeu gebore, waar hy toe na vier dae deur takbokboere gevind is. As gevolg van sy tyd in die sneeu, het Burgert ‘n buitengewone dik en selfverhittende vel ontwikkel. Alhoewel hy mal was daaroor om saam met sy aangenome familie takbokke groot te word, het hy met sy 18de verjaarsdag sy eie takbok, Orlick, opgesaal, die huis verlaat en by Green Peace aangesluit. Tydens ‘n sending na die Arktiese see het Burgert homself aan ‘n walvis vasgeketting om te keer dat dit gejag word. Hy kon homself egter nie loskry nie, en reis toe saam met die walvis deur al sewe die oseane. Te danke aan sy selfverhittende vel en stukkies plankton het hy die reis oorleef en uiteindelik in Hermanus opgeïndig. Die ketting was teen diè tyd deur geroes en Burgert het losgebreek en homself in Stellenbosch gevestig.

Burgert gebruik tans sy walvis- ry ervaring om as Bedryfsielkundige vir maatskappye improvisasie werkswinkels aan te bied, om hulle te help om beter saam te werk en innoverend te wees.

Bordeax Potgieter

Sommige van die monsters moes in die wild gevang geword het. Bordeax (Dou) Augustyn Potgieter was so ‘n geval. Bordeaux het uitgebroei in ‘n grot in Botswana. Daar is hy aangeneem deur twee swaeltjies wat dadelik die voordeel ingesien het van ‘n kind wat baie groter is as hulle. Hul frustrasie het egter gebou en gebou nadat herhaalde pogings om Dou te leer vlieg nie gewerk het nie. So is Dou toe alleen in die grot agter gelos, toe hulle noord vlieg vir die winter. Dit was egter nie lank nie of ‘n familie dassies, wat al maande lank jaloers was op die Swaeltjies swaeltjies met hulle groot kind, het hom onder hul spreekwoordelike vlerk geneem. Die dassies het mettertyd Kaapstad toe getrek en teen die hange van Tafelberg huis opgesit. Dit is toe dan ook waar ons vir Dou gekry het, al klouterend oor die rotse.

Met sy aankoms in Potchefstroom het ons Dou dadelik by die NWU ingeskryf, waar hy tans B.Com Regte studeer.

Leon Malan

Leon Malan is een van ons twee “brein” monsters. Hy is gebore met ‘n buitengewone groot brein, grootliks te danke aan radiasievergiftiging. Leon is in die Himalayas gebore en na ‘n Buddhistiese klooster gevat, waar hy grootgeword het en ook die monnike se Kung Fu gevegskuns aangeleer het. Die Dalai Lama het egter nie van sy groot brein gehou nie, en hom verban na die kombuis, waar hy sop moes maak vir al die monnike. Tydens ‘n episode van “Jamie does Tibet” is Leon deur Jamie Oliver ontdek, en Jamie het hom dadelik onder sy vlerk geneem. Te danke aan sy groot brein het hy binne 37.5 uur alles oor kosmaak geleer wat hy kon, en toe die wêreld ingevaar om ‘n bekende chef te word. Sy kans het gekom toe Top Billing hom sy eie program aanbied, The Karate Chef, waar hy kosmaak en dan met Jackie Chan baklei vir die porsies.

In sy vrye tyd is Leon ook besig met sy Meestersgraad in Kerningeneurswese by die NWU in Potchefstroom.