Hoogtepunte. Ons herleef die hoogtepunte van ons reis van rondloop en kuier saam met Christo Botha deur die Noord- en die Suideiland van Nieu-Seeland waar vanjaar se Rugbywêreldbeker gespeel word.

Avontuursport

Nieu-Seelanders is sportmal.  Hierdie relatief klein land van 4 miljoen inwoners blink internasionaal uit in ‘n verskeidenheid sportsoorte.  En as Nieu Seelanders nie ‘n sport beoefen nie, doen hulle graag avontuursport vir die sports!  Ons doen mee aan ‘n paar van die avontuursporte in Rotorua saam met ‘n oud Suid- Afrikaner en  Meneer Nieu Seeland 2011, Arnold  du Toit.

Christchurch is verpletter. Die Kiwis steek hulle hande diep in hulle sakke en maak hulle harte oop om te help met die opbou van die pragtige ou dorpie, die grootste stad in Nieu Seeland se Suid-Eiland. Ons gesels oor die herbou van Christchurch en ons kyk na die rol van vroue in ‘n kultuur waar ‘omgee’ broodnodig is.

Werkende Honde

In Nieu-Seeland gaan honde en vee op die plaas saam soos snoek en patat. Honde is nie troeteldiere nie, maar plaaswerkers.  Groot troppe skape in reusagtige berge en eindelose heuwels is klei onder die waak van ‘n goed opgeleide hond. Christo neem ons na sy buurman in Waikato om te wys hoe net twee manne ‘n veeplaas bedryf met die hulp van vier werkshonde. Na al die aksie maak hulle keelnat in die werkersklub en almal gesels rugby.

Toerisme en Flieks

Daar is nie veel oor van die filmstelle van die Lord of the Rings trilogie wat in Nieu-Seeland verfilm is nie. Alles is na verfilming afgebreek omdat niks die natuurlike omgewing hier mag ontsier nie. Christo loop rond in die indrukwekkende natuurskoon van die Suid-Eiland en besoek Arrowtown, ‘n ou goudmyndorpie, sien die brug waar rekspring ontstaan het, besoek die mooie Queenstown en bekyk die nuwe rugbystadion in Dunedin waar Christchurch se wêreldbekerwedstryde nou gespeel word.  Ons bewonder ook die werk van Ronel Schodt, wat ‘n multi-miljoen dollar kontrak losgeslaan het om die Rugbywêrelbeker in 3D te verfilm om in teaters uit te saai.

Rotorua

Rotorua is ‘n pragtige dorp gebou op spuwende vulkane en pruttende modderpoele waarvan stadsingeneur Nico Claassen ons meer van vertel.  Ons leer meer oor die Redwoodwoud en die Silver Fern asook van Moari tradisionele kos, wat in die vulkaniese warm water gaargemaak word. Ons sien ‘Big Splash’ in volle glorie – ‘n spuwende gyser van oor die 100 meter hoog! Ons staan verstom oor die herkoms en toekoms van hulle geliefde Kappa Hakka (kappa beteken ‘ry’ en hakka ‘dans’)

Nieu-Seeland se Groot Vyf


Die eilande van Nieu-Seeland het net twee soogdiere wat natuurlik daar voorkom – twee klein vlermuisspesies. Geen ander soogdier nie… En geen slange nie. Hulle groot 5 is die natuurskoon, toerisme, jag, visvang, en rugby, glo Willie Bezuidenhout. Ons vergesel hom en sy gesin op uitstappies na die Nieu-Seelandse Groot Vyf en ons besoek saam met hulle ‘n rugbywedstryd op Edin Park.

Bokke en Beeste
Elke enkele bees in Nieu-Seeland is opgeteken – boere koop dus met gemak kuddes oor die internet aan. Takbokke het ‘n ander vreethoogte as beeste en word saam met beeste aangehou. Die horings word geoes, verpoeier en uitgevoer Ooste toe as ‘n plaasvervanger vir renosterhoring. Christo vertel meer oor bees-en-bokboerdery in Phukekohe en gee raad vir rugbytoeriste oor hoe om drankies te bestel in ‘n kroeg

Kiwi Klopse
Christo loop Klopse raak in die hartjie van Auckland. Die leier is oud-Kaapenaar, Ruthewaan Waggie. Sy kleurvolle troep bestaan uit Maleiers, Afrikaanses, Kiwis, en Sjinese. Ons kuier by Waggie se skool waar hy die gym-onderwyser is en ons vergesel die Auckland City Dukes na ‘n wedstryd van die Stormers teen die Chiefs op Hamilton as hulle dit ophelder met Kaapse liedjies en ghoema-klanke.

Bokke en Beeste
Elke bees in Nieu Seeland is opgeteken, wat beteken boere kan met gemak kuddes oor die internet aankoop. Die Kiwis hou ook takbokke aan, wat ‘n ander vreethoogte as beeste het, saam met hul beeste aan. Die horings word geoes, verpoeier en uitgevoer Ooste toe as ‘n plaasvervanger vir renosterhoring. Christo Botha vertel meer oor bees-en-bokboerdery in Nieu Seeland en gee raad vir rugbytoeriste oor hoe om ‘n drankie te bestel in ‘n kroeg.