Esther van der Westhuizen

Esther van der Westhuizen fokus op Groen op die kleiner diere wat ons so maklik miskyk - die insekte, spinnekoppe en skerpioene, en ook kleiner soogdiertjies soos muise. Esther het haar debuut as Groen-aanbieder op 17 Augustus 2008 gemaak, met ´n heerlike program oor die goggas van die Groot Karoo!

Esther het in 1986 by die Universiteit van Wes-Kaap as dosent in Dierkunde begin werk, nadat sy haar M.Sc. Dierkunde by die Universiteit van Stellenbosch voltooi het. Sy het vir sowat 9 jaar daar klas gegee, waarna sy saam met haar ma die skoenlapper- en insekpark, Butterfly World, begin het.

Deur met skoenlappers en ander goggas te werk het ‘n wêreld vir Esther oopgegaan wat haar al geneem het vanaf die reënwoude van Maleisië en Kenia, na die Sonorawoestyn in Arizona, skoenlapperparke in Europa, Australië, Asië en VSA. Sy stel belang in die opvoedkundige waarde, asook die welstand, van diere wat vertoon word in dieretuine, en dien op die uitvoerende komitee van die African Association of Zoos and Aquaria.

In die laaste paar jaar het haar belangstelling begin neig na spinnekoppe, veral toe sy begin agterkom het hierdie groep diere is ongelooflike divers, interessant, misterieus, glad nie gevaarlik nie, en mooi, mooi, mooi!

Marius Burger

Dit wat grillerige gediertes is vir die meeste van ons, beskou Marius as sy vriende in lae plekke. Al van skooldae af vang hy alles wat wriemel en seil en kruip en spring, en met die jare heen het hy al wyd en suid gereis op soek na reptiele en amfibiërs. In Gaboen het hy vir maande lank die reënwoude verken tydens herpetologiese opnames vir die Smithsonian Instituut, en het hier selfs gehelp met krokodil-flilms saam met National Geographic.

In die Sentraal Afrika Republiek het hy ‘n bietjie teenspoed opgetel toe ‘n klein burgeroorlogie hier uitgebreek het. Sy medewerkers en hy kon gelukkig hierdie penarie ontglip deur met die Dzanga Rivier af te roei en toe met ‘n ompad deur Kameroen en Frankryk het hulle weer die pad huistoe gevind.

Op sy eerste besoek aan Kenya het hy ‘n nuwe padda spesie ontdek binne 15 minute van sy vertrek vanaf die lughawe. Die huurmotor se venster was oop, en Marius het die bestuurder laat stop toe hy die roepe van ‘n onbekende blikslanertjie vanuit ‘n poeletjie langs die pad gehoor het. In Madagaskar is ‘n nuwe spesie padda na hom vernoem - Boophis burgeri - of Burger se Glinsteroog.

Marius se pa wou gehad het dat hy ‘n gesondheidsinspekteur moes word, maar gelukkig vir ons almal het Marius daarteen besluit en eerder ‘n loobaan in natuurbewaring gevolg. Hy was vir 11 jaar ‘n navorsingsassistent by Oos-Kaap Natuurbewaring en is tans die projekherpetoloog vir SARCA (Southern African Reptile Conservation Assessment) - ‘n inisiatief wat ten doel het om die Rooidataboek vir reptiele van Suid Afrika, Lesotho en Swaziland te hersien.

Hy is een van die redakteure van die Suid Afrikaanse Padda Atlas Projek wat in 2004 gepubliseer is en het onlangs saam met Krystal Tolley van SANBI ‘n boek oor Suid-Afrika se verkleurmannetjies geskryf.

Dave Pepler

5 Januarie 2004 het Dave in die eerste episode van Groen verskyn en sedertdien is hy elke week op die kassie te sien. Elke keer in 'n nuwe omgewing, besig om die wonders van ons natuur te verken. Junie 2006 is die 100ste episode van Groen uitgesaai, met hom natuurlik as aanbieder.

Die Groen-span besoek Namibië, Botswana, Tanzanië, Zanzibar en natuurlik Suid-Afrika gereeld en sorg vir nuwe episodes elke week. Dave bied aan kykers 'n persoonlike ervaring van ons natuurskoon - van die oewerkonyn, suidelike Noordkaper walvis, seeskilpaaie langs die Natalse kus, krokodille en seekoeie van die Okavango, die wêreld se grootste landkrap en 'n ontmoeting met die Rooi kolobus van Zanzibar. Hy waag ook gereeld sy lewe om kykers nader aan gevaarlike diere te bring- van boomslange tot die skaars Gaboen-adder - en duik selfs tot dieptes van 38 meter agter die groen seeskilpad aan!

As jy vir Dave ontmoet, besef jy die natuur is sy passie, maar wat hy die meeste geniet is om dit met jou te deel. Hy is in Robertson gebore en sy heel eerste ontmoeting met die veld was saam met sy oupa, Boy le Roux, wat hom speels in 'n kruiwa uit die dorp gestoot het om die veld te gaan verken. Dave se belangstelling in die veld was dus amper 'geneties' en vorm die basis van sy bestaan.

Dave het aan die Hoërskool Robertson gematrikuleer, waarna hy Bosbou aan Saasveld-bosboukollege gestudeer het. Hy het later 'n M.Phil-graad in Dierkunde aan Cambridge Universiteit verwerf. Tot met sy aftrede in 2005 was hy 'n senior lektor by die Universiteit van Stellenbosch se Departement Bewaringsekologie.

Tans is hy verbonde aan die CIB (Centre for Invasive Biology) by die US en gee steeds klas by Bewaringsekologie. As omgewings-konsultant strek Dave se bydrae tot diep in Afrika en Chile, Tanzanië en Uganda. Hy skryf gereeld artikels en bydraes vir VISI en Insig-tydskrifte.