Pippa Venter

Pippa Venter (Nadia Valvekens)
Verpleegster

As sonstraaltjies, somer, ‘sugar, and spice, and everything nice’ in een liggaam gegiet sou word, dan is Pippa die resultaat. Sy sit amper nooit ‘n voetjie verkeerd nie, hou haar besig met die belangrike goed in die lewe, en pak elke dag haar glimlag in werk toe. By die huis mag sy dalk so nou en dan met n traan in die oog sit, maar wanneer werkstyd aanbreek is sy die een op wie se knoppie daar enige tyd gedruk kan word. Sy is so bietjie naief, maar beslis nie ‘n dromer nie. Pippa is ‘n regte plaasmeisie, wat met haar kop omhoog loop, en haar voete stewig op die aarde geplant hou.

Daleen Oosthuizen

Daleen Oosthuizen (Desiré Gardner)
Verpleegster

Daleen is Pippa se eweknie, alhoewel sy ‘n baie meer realistiese uitkyk op die lewe het. Sy droom baie, maar leef in die werklikheid en laat nie klein dingetjies toe om haar onder te kry nie. Daleen werk hard, maar speel ook hard – sy het definitief die potensiaal om haar man op en van die sportveld vas te trek. Daleen is jou tipiese eks-joolkoningin wat daarop uit is om vir haar ‘n droom-dokter eggenoot te kry en die res van haar jare in gemak en styl te spandeer.

Elise Kruger

Elise Kruger (Lindie Stander)
Verpleegster

Die ander helfte van die skindertong-brigade wat altyd opsoek is na ‘n man in haar lewe, het ook die vermoë om ‘n storie so te verdraai dat alles behalwe die volle waarheid versprei word. Sy is ook altyd uit daarop om haarself in ‘n goeie lig te stel, en het baie meer ambisie as wat sy talent het. Sy is ook altyd opsoek na ‘n ekstra inkomste, en glo dat haar sin vir humor haar ‘n uitstekende skerpskertser maak. Sy is ook Binneland se nie-amptelike amateur speurder, wat heel dikwels net met snuf in die neus wegkom.

Franz Basson

Franz Basson (Dawid Minnaar)
Navorser en dokter

Die verstrooide professor wat glad nie verstrooid is nie – dis hoe ‘n mens hierdie dokter kan opsom. Hy is nie ‘n baie sosiale karakter nie, en kom beter oor die weg met sy boeke en laboratorium-instrumente as die mense rondom hom. Franz hou baie van sy eie geselskap, soos meeste intelektuele reuse, en hy is baie passievol oor die werk wat hy doen.

At Koster

At Koster (Hans Strydom)
Hospitaal-administrateur en hoof-aandeelhouer van Binneland Kliniek en sakeman

‘n Ambisieuse sakeman wat nooit ‘nee’ vat vir ‘n antwoord nie, altyd kry wat hy wil hê (ongeag die koste), en ‘n gedugte teenstander. At is die argetipe-skurk, die sogenaamde wolf in skaapklere, wat sy prooi verslind, of laat verdwyn. Met nog ‘n egskeiding agter die rug, is die tyd dalk ryp vir At om weer ware liefde te vind – maar wie sien kans vir dié man?

Kallie Koster

Kallie Koster (Tobie Cronjé)
Mede-eienaar van ToniK

Kallie is At se langverlore, aangenome broer wat At gereeld in die skande steek met sy groter as groot stories en kwinkslae. Hy is die teenoorgestelde van At, en maak dinge op soos wat hy aangaan deur die lewe. Die man het ‘n hart van goud, en verafgod die grond waarop At loop.

Jennifer Adams

Jennifer Adams (Sandi Schultz)
Internis by Binneland Kliniek

“Stille waters, diepe grond” beskryf die dokter die beste. Sy is ‘n spesialis in haar veld, maar haar koue saaklikheid waarmee sy pasiënte hanteer maak haar nie uiters gewild nie. Sy ken pyn maar al te goed, en beskerm haarself deur afsydig en koud te wees – alhoewel sy eintlik net die teenoorgestelde is teenoor dié wat haar werklik ken. Net jammer sy laat nie veel mense toe om haar regtig te leer ken nie. Jennifer is ook heel dikwels die morele kompas vir die res van die Binneland-span.

Pippa Venter

Pippa Venter (Nadia Valvekens)
Verpleegster

As sonstraaltjies, somer, ‘sugar, and spice, and everything nice’ in een liggaam gegiet sou word, dan is Pippa die resultaat. Sy sit amper nooit ‘n voetjie verkeerd nie, hou haar besig met die belangrike goed in die lewe, en pak elke dag haar glimlag in werk toe. By die huis mag sy dalk so nou en dan met n traan in die oog sit, maar wanneer werkstyd aanbreek is sy die een op wie se knoppie daar enige tyd gedruk kan word. Sy is so bietjie naief, maar beslis nie ‘n dromer nie. Pippa is ‘n regte plaasmeisie, wat met haar kop omhoog loop, en haar voete stewig op die aarde geplant hou.

Bea Delport

Bea Delport (Elma Postma)
Skakelbeampte by Binneland Kliniek

Die nuutste toevoeging tot die werking van Binneland Kliniek moet nog haar plek vind in die gange van die hospitaal waar almal se privaatlewens onder ‘n vergrootglas dop gehou word – iets wat die beskeie en op-die-man-af vrou nie gewoond aan is nie. Sy kan wel haar man staan, maar of sy agter hom sal staan wanneer die tyd ryp is, is ‘n ander vraag!