Programme

31 Mrt 2015

Binnelanders

Binnelanders, ’n halfuur lange weeksdag-drama, handel oor die wel en weë van die mense wat hul toevlug en heil vind by die Binneland-kliniek. Alles lyk van ver af gesond, maar in die gange en sale van dié kliniek – heel dikwels ook in die raadsale – is dit ’n ander storie.

Vir enige navrae, stuur gerus ’n e-pos na ernst@starkfilms.co.za.

29 Sep 2015

Boer Soek ‘n Vrou

Die agtste seisoen van Boer Soek ’n Vrou skop af op 1 Oktober 2015 om 20:30 op kykNET. Dié werklikheidsreeks, wat ook internasionale sukses geniet, volg hubare boere in hul soektog na liefde.

Die tien boere van regoor Suid-Afrika is in Mei bekendgestel en die briewe van hoopvolle kandidate het ingestroom.

Vanaf 1 Oktober kan kykers saam met die aanbieder Nadia Beukes reis soos wat sy die briewe in Hopetown, Pongola en Worcester aflaai. Die vyf boere met die meeste briewe sal dan gevolg kan word op hul eerste ontmoetings, afsprake, uitdagings en kuiers op die plase.

Watter boer gaan liefde met die eerste oogopslag vind en watter pot gaan ’n deksel kry? Op 1 Oktober om 20:30 begin die soektog vir liefde weer op kanaal 144!

31 Mrt 2015

Bravo!

Die Bravo!-span het hul vinger sterk op die pols van bekendes se doen en late – of dit nou op die rooi tapyt, agter die skerms of by die huis is.

6 Des 2015

Die Boekklub

Die Boekklub is ’n opwindende nuwe dramareeks. Met groot name soos Jana Cilliers, Armand Aucamp en June van Merch en ’n omvangryke storielyn, beloof dié reeks van 13 episodes om kykers week ná week terug te roep vir nóg ’n hoofstuk.

6 Okt 2015

Die Boodskap

29 Jun 2015

Die GROOT Ontbyt

GROOTfm 90.5 se gewilde ontbytprogram, Die GROOT Ontbyt, gaan vanaf 10 Augustus 2015 elke weeksoggend tussen 06:00 en 08:00 regstreeks op kykNET uitgesaai word.

Dié samewerking is ’n eerste in sy soort. Terwyl luisteraars op pad werk toe na Die GROOT Ontbyt op hul radio’s luister, gaan diegene by die huis ook in die opwinding kan deel deur middel van hul televisiestelle. Die aanbieders gesels dus nie net met GROOTfm-luisteraars nie, maar ook met kykNET-kykers. Luisteraars en kykers kan uitsien na ’n program propvol aktualiteit, nuus, verkeer, weer en natuurlik goeie Afrikaanse musiek.

7 Jan 2016

Die Munisipaliteit van Gwarra Gwarra

Die munisipaliteit van Gwarra-Gwarra gaan kykers laat kraai van die lag. Dié kykNET-sitkom is ’n Willie Esterhuizen-reeks, met onder andere Frank Opperman en Lizz Meiring.

31 Mrt 2015

eNuus

eNuus se eerste nuusbulletin is op 18 Julie 2010 uitgesaai. Dié datum is ook die verjaarsdag van oudpres. Nelson Mandela.

Die pioniers van die projek is saamgestel uit joernaliste met wye ervaring in koerante, radio en televisie.

Sedertdien het eNuus gegroei tot ’n formidabele span nuusmense – trots op wat hulle doen en beskermers van die handelsmerk en sy waardes.

eNuus is nie net ’n Afrikaanse of Afrikaner-nuusbulletin nie – ons omhels die totaliteit van Suid-Afrika en sy diversiteit. In daardie opsig is eNuus meer as ’n nuusbulletin – ons is deel van ons gemeenskap en gee vir hulle om. Daarom het ons ’n span van ons eie verslaggewers en vertaal nie net Engelse nuus in Afrikaans nie. Dit maak ons inhoud uniek. Die nuuslesers is deel van die skryfspan – hulle daag nie net laatmiddag op en lees die nuus op televisie nie. Hulle is dus deel van die nuus en nie net pratende gesigte op die TV-skerm nie.

Terselfdertyd is eNuus deel van die 24 uur-nuuskanaal eNCA op DStv. Dit gee ons toegang tot ’n wye netwerk nuushulpbronne.

Sport is vir ons belangrik en ons bied omvattende dekking van die grootste sportsoorte, maar het ook ‘n sagte plekkie vir die kleineres – daar waar mense presteer sonder om groot tjeks te verdien.

Ons het ons eie weerspan – omvattende weervoorspellings deur ons eie meteoroloë.

Ons hou van stories oor mense. Gaan kyk gerus na dit wat jy al misgeloop het op eNuus by www.enca.com/encaafrikaans.

Die beste nuusdekking op televisie in Afrikaans word elke aand regstreeks om 19:00 op kykNET (kanaal 144) en kykNET & kie (kanaal 145) uitgesaai.

Volg eNuus ook op Twitter onder die naam @enuus, stuur e-pos na enuus@enca.com of bel ons by 011 759 6454.

31 Mrt 2015

Fiësta

Fiësta is nou al vir meer as tien jaar sinoniem met feeste in ons land, asook in buurlande soos Namibië. Ons besoek weekliks ’n ander fees. Só word daar nie net regoor die land gekuier nie, maar ons bring interessante plekke na die sitkamers van ons kykers. Groot feeste soos die Absa KKNK, die Clover Aardklop Nasionale Kunstefees en Innibos word jaarliks besoek. Dit is egter nie waar dit stop nie.

Ons besoek ook van die kleiner feeste op plekke in die land waar mense nie aldag kom nie. Ná meer as tien jaar is daar steeds dorpe en feeste waar Fiësta nog nie gekuier het nie en stel ons jaarliks ook van dié feeste aan ons kykers bekend. Wat Fiësta verder uniek maak is die feit dat ons elke week ’n ander aanbieder het. Ons aanbieders is gewoonlik bekende sangers of akteurs wat by die feeste optree.

Vir enige navrae, stuur gerus ’n e-pos na fiesta@compute.co.za.

31 Mrt 2015

Geloof, Hoop en Liefde

’n Lekker-kuier, Christen-leefstylprogram met Lindie Strydom as aanbieder. Elke week gesels ons met interessante mense, kyk na goeie produkte en wys die top-10 verkopers in die geestelike mark.

1 Korinthiërs 13:13 [DB]
Drie belangrike dinge wat ons op koers moet hou: daar is die verhouding met God (GELOOF), die sekerheid dat Hy sy beloftes sal hou (HOOP) en die LIEFDE. En van hulle staan die LIEFDE boaan die lys.

31 Mrt 2015

JAM!

JAM! is ’n weeklikse joernaalprogram oor Afrikaanse musiek.

31 Mrt 2015

Jukebox

Jukebox is ’n program wat regstreeks uitgesaai word en waar kykers die geleentheid kry om versoeke te stuur om musiekvideo’s wat hulle graag op die kassie wil sien te speel. Aanbieder Pieter Koen verwelkom ook elke week ’n paar gaste in die ateljee, wat wissel van SA se bekendste Afrikaanse kunstenaars tot jong sangtalent wat binnekort die musiekbedryf gaan oorweldig.

ID:211917